Ïðî÷èòàíèé :  115
|
Òâîð÷³ñòü |
Á³îãðàô³ÿ |
Êðèòèêà
Gentilesse
The firste fader and findere of gentilesse,
What man desireth gentil for to be
Most folwe his traas, and alle his wittes dresse
Vertu to sue, and vices for to flee:
For unto vertu longeth dignitee,
And nought the revers, saufly dar I deeme,
Al were hemitre, crowne, or diademe.
This firste stok was ground of rightwisnesse,
Trewe of his word, sobre, pietous, and free,
Clene of his gost, and loved bisinesse
Against the vice of slouthe, in honestee;
And but his heir love vertu as dide he,
He is nat gentil, though he riche seeme,
Al were he mitre, crowne, or diademe.
Vice may wel be heir to old richesse,
But ther may no man, as ye may wel see,
Bequethe his heir his vertuous noblesse:
That is appropred unto no degree
But to the firste fader in majestee,
That maketh his heir him that wol him queme,
Al were he mitre, crowne, or diademe.
|
|
